منتديات لك عيوني - تثبتت فـي مركـز القلـب تثبيـت

البارحـه كثـر الهمـوم أوجعتنـي
...........بمد كفي لاقـرب النـاس وأزريـت

هزت معاليـق الحشـا وأزعجتنـي
...........وأنا أحسبني تالي الوقـت سجيـت

أكنهـا مـا بيـن ضلعـي ومتنـي
...........واليا طرت سود الهواجيس.. سميت

من قبل لانطقها جـزت وأنطقتنـي
...........ماعـاد يمـدي كبحهـا لوتقوّيـت

والسيرة اللـي فالعتـب سيرتنـي
...........تثبتت فـي مركـز القلـب تثبيـت

وان جيت أبعثرها شتات أجمعتنـي
...........كني على درب المصافيـن حنيـت

أطلقت مـدات العطـا وأحبستنـي
...........ماجت على كيفي حسـب ماتمنيـت

مانيـب ندمانـه.. ولاحسفتـنـي
...........لني من أسباب الفضايـل تحليـت

لكن ليه (أم المشاكـل).. جفتنـي!
...........وأنا لها من صافـي الـود مديـت

كـم ليلـهٍ ألهمتهـا.. وألهمتنـي
...........عشانها من حالي النـوم ..فزيـت

حتى من أغلى ناس عندي خذتنـي
...........أقبلت في رغبة هواهـا ولا أقفيـت

تنكـرت لـي بالغـلا.. وأنكرتنـي
...........ماكني اللي مـن غلاهـا.. تعنيـت

لو ضاق صدر المعضله ماسعتنـي
...........روحي تذريها وقلبـي لهـا بيـت

وشلون بعد الماضيات.. أصدمتنـي
...........عقب الصدارة صار فالوضع تصويت

باسباب منهو مايساوي.. عصتنـي
...........لاهوبنافعهـا.. ولابانـي ٍ صيـت

ولـع فتيـل الشر..والنـار جتنـي
...........وأنا على حقوق البشـر ماتعديـت

مررتهـا.. ميـر الحميـا عمتنـي
...........دون الكرامه بالفهامـه.. تحديـت

ياليتهـا فـي حالتـي.. مقنعتنـي
...........الظلم في كبد المظاليـم ..حلتيـت

مالومها لو من غباهـا.. شوتنـي
...........ياللي جهلت الحُر..مخطي ولا أقديت

ياكيف أبعطيهـا وأهـي ماعطتنـي
...........يغفرلي الله كـان للظلـم.. رديـت

حنـا انتهينـا.. والنهايـه بدتنـي
...........ماعاد ينفع قول.. ياليـت وياليـت

القصيده للشاعره : مــســك

راقت لي كثير

ونقلتها لكم

لعلها تنال أعجابكم

أخوكم : ذكراها غالي