السلآم عليكم ../

آسعد الله آوقاتكم يالغآليين ..

ان شالله يكون الجميع بخير وصحه وسلامة ..

كل عام وانتم بخير ورمضان كريم ..

مشكلهـ ومشآكل ومشآكلنا ومشآكلهم ..!!

البطآله ..!
الرآتب البسيط ..!!

خلنا نشوف البطآله ..
البطآله كما يزعم البعض وكما نرى انتشرت في مجتمعنا السعودي بشكل كبير .. احد سأل ليش .؟؟
اكيد الكل سأل وجاوبوهـ السبب الاجنبي ..!

هل الاجنبي هو السبب في البطاله؟؟

لا يآبعد رآسي يآمن تعتقد هو السبب .. تدري ليه.؟؟
اول شيء الوظايف مليانه والي يقول لا اقوله انت ماتدور ../
لاتفكر بالوظيفه الي فيها مكتب وفيها وفيها .. تدري ليه؟
لانه لازم تبدأ من الصفر .. لازم تتعب وتبدأ شوي شوي .. لين توصل للمرحله الي ترضيك ../

والله ياشباب اغلب الي اعرفهم بالصيف توظفو .. اقولكم وش توظفو..
واحد توظف في الاستقبال بمعهد
وواحد توظف في محل ملابس داخليه نسائيه < اكيد البعض بيضحك ..
وواحد توظف بمكتبه
وواحد توظف بشركه نوكيا بمعرض لهم
وواحد توظف مع شركه عذيب مندوب
وواحد توظف بمطعم
وواحد توظف يدور كذا ويوزع كليجا . اسمها اظن كليجا القصيم ..

هذي كلها خلال شهر واحد اسمعهم يقولو توظفت بالمكان الفلاني .. واعرفهم ..

المهم ../

الي يقولك بطاله ومني لاقي شغل تلقاه يدور على مكتب يقعد فيه رجل على رجل ..

الاجنبي يوم تلقاه بشركه تكون الشركه قطاع خاص والشركه ماخذته كذا عبث ..!

ليه انت ماتدرس وتكافح وتتعب ..؟ بس للاسف عندنا الجامعات خربت على نصف الشعب الدراسه بنظامهم البايخ ..

الحين البعض يقولك الاجنبي هو الي يحصل وظايف بمرتبات عاليه ..
الحين لو جاك واحد حاصل على شهاده وعنده لغه .. وجاك واحد ماعنده شهاده ولا لغه .. مين بتوظف؟ اكيد المتعلم ..

الاجنبي وماادراك مالاجنبي .. تعرفون احنا مابنعيش بدونهم .؟؟
مين راح يوصل ويجيب اخوانك من والى .؟ في البعض هم يروحو يوصلوهم . بس قليل
مين راح ينظف البيت .؟
مين راح ينظف الشارع .؟
مين راح يسوق سيارات البلدية حقت الزباله وانتم بكرامه ..؟

مين الي راح يسوي مشاريعنا؟
واحنا 99.99% مننا مايبي وظيفه بالشمس ..! والاغلبيه والاكثر من المهندسين المدنين هم اجانب ..!!
عندنا نسبة بسطيه مهندسين معمارين .. مهندسين اتصالات شفت اثنين بشركه الجميح يعني في بس نسبه بسيطه .. مهندسين كهربا مهندسين ميكاترونكس مهندسين مهندسين ..!!

الاغلب يفكر بالطب واذا ماجاه طب راح تجاره ولا حقوق ولا تربيه مااقولك التخصصات هذي شينه بالعكس كل شي ممتاز لاكن دور على شي انت تبدع فيه دور على شي قليل الي يتخصصون فيه ..
ليه حنا مانكون مهندسين مدنيين؟؟ وليه حنا ماناخذ شهادات بعدين اذا ماتوظفنا نقول بطاله ..!؟؟

صحيح انه البعض عنده شهاده ومايتوظف لاكن قليل مره مره ..

يعني لو جاك راتب بـ 3000 بالله ماهو نعمه؟

الاخوان بمصر الشعب بعضه او نصفه رواتبه اقل من 2000 جنيه وتلقاه عايش ومبسووووووط ..

ليه مانرضى بالقليل .؟ ومن القليل الى الكثير والاكثر.؟؟

يعني لازم الراتب يكون 10000؟؟

ليه مانشوف البطاله بمصر؟

تدرون ليه .؟ مصر رحتها وشفت الشعب وش يشتغل .. مايقول لا عيب لا تعب لا قرف لا مدري ايش .. والله يااخوان اني اشوفهم يحملون الشنط بالمطار .. اشوف القهاوي المطاعم كل مكان .. مصر سكانها عدده خيالي ماشالله .. ومايقولون بطاله ..!!

خلينا نروح للاردن ..~
انا رحت الاردن وشفت الي يشتغلون بالمقاهي والمطاعم .. الخ
ماشفت هنود . ماشفت الا اهل البلد .. وتلقى نساء او رجال بالمطعم يشتغلون ..!

شوف الدول الثانيه .. ليه مايشتكون من البطاله.؟؟

القنآعه كنز لايفنى .. ارضى بالقليل ..

والله يااخوان مافيها شي لو نشتغل اي وظيفه .. اشتغلت قبل كم يوم لمده 6 ايام بمحل والمحل كانت وظيفتي فيه اني اعبي من العلب بالاكياس واحط ستكر ونوزع ونبيع .. ويوم قلت لواحد كذا اشتغل قام يضحك ويقولي بالله مالقيت غير هالوظيفه ..!!
والله الحمد لله طلعت منها بـ مبلغ ممتاز ..

الي يبي الوظايف يروح المولات يشوف المحلات .. يسأل عن الاداره ويروح لهم ويقدم اوراقه .. حسب علمي اغلب الادارات تكون في شارع الستين بالملز ./

المولات تحتاج شباب بشكل كبير للوظايف .. رح قدم منت خسران ..

بالتوفيق للجميع ..

والله ياخوان ماتكلم الا من الي اشوفه الكل يشتكي من البطاله والبطاله .. ويقولو الاجنبي والاجنبي .. يااخوااااااااااااان الرزق من رب العالمين .. والعبد لابد يسعى .. ورب العالمين ماهو غافل عن احد ولو فيه ظلم ... ربك يمهل ولا يهمل اصبر على الظلم اذا تشوف انه ظلم ومصيرها تفرج ../

يرزق من يشاء بغير حساب < ياليت ندقق على من يشاء ../
واسال الله العلي العظيم ان يرزقنا وايااكم ... ويكتب لنا كل خير ..

دمتم بحفظ الله ورعايته .. والمعذره اذا اخطيت بشيء ان اصبت من الله وان اخطأت مني ومن الشيطآن ..//

آخوكم ومحبكم ../ احمد الجربوع

::TRAIDNT FORUM::