وآخرتها [ معليش ] .. فعلاً رد أقبح من فعل .. ( قصة طريفة )

[شيخ نفسه]

السلام عليكم ورحمة الله وبركاته



مساء الخير للجميع ..



قصة طريفة حصلت لي قبل أكثر من ثلاث سنوات فحبيت ان تشاركوني المأساه ص4





طبعاً هذا اول موضوع لي بالقسم واتمنى اني اكون افدت واستفدت



..



..


..



..



مشيت من الرياض أنا وواحد من اخوياي متجهين لمدينة الخبر ..


عشان اشري غرض من محل الكترونيات طبعا سماحتي من سكان الرياض >>> رايح عشان غرض و0


وصلنا تقريباً الساعة 11.20 مساءا ..


لكن لقينا المحل الي نبي نشري منه الغرض مسكر ( مغلق ) ..


سألنا أحد العمال : صديق متى يفتح محل بكره ؟


قال : بكره ساعه 8.30 ..


قلت : خير ان شاء الله اليوم نبي نفلها بكورنيش الخبر وبكره نشري الغرض ونمشي


المهم


استأجرنا شقة باحد احياء الخبر وطلعنا نتمشى على البحر ..


فقال صاحبي : خلنا نكلم خوينا محمد ( من سكان الخبر ) عشان نقابله ونسلم عليه دام حنا قريبين ..


قلت : اوك


كلمنا محمد وقابلناه بكورنيش الخبر ..


وأصر على الغدا بكره


قلنا : يابن الحلال حنا ماشين بكره نبي ناخذ غرضنا ونمشي باسرع وقت ..


المهم


نشبق بحلوقنا فرضينا بالامر الواقع ..


وقلنا يصير خير ان شاء الله


رجعنا انا وصاحبي للشقة الساعة 4.صباحاً ..


ونمنا الى الى الساعة الـ 8 صباحاً عشان نروح للمعرض


أفطرنا ثم سلمنا الغرفة و وصلنا المحل في الثامنة والربع تقريباً ..


(( كل هذا عشان مانتأخر ونحضر عزيمة صاحبنا محمد ))


إنتظرنا المعرض حتى فتح في نفس الوعد ..


وقفنا السيارة بموقف آمن بعيد عن الزحمات


طبعاً كان المعرض داخل مجمع أسواق تجارية (( الراشد مثلاً )) ..


دخلنا الأسواق ودخلنا المحل واشترينا الغرض


طلعنا تقريبا الساعة الثامنة وخمس وأربعون دقيقة ..


بعد ماوصلنا السيارة


تفاجئنا بأن راعي سيارة مكسيما واقف خلف سيارتنا مباشرة ..


طبعاً المواقف ماهي خاصة لكن تابعة لزبائن المجمع


دورنا عن صاحب السيارة لكن لا احد ..


راح صاحبي إلى السيارة يشوف يمكن فيها رقم لكن لم يجد له أي رقم ..


رحت أنا أدخل المحلات اللي في المجمع وكل مالقيت شخص :


قلت : (( تبعك المكسيما السوداء اللي بالمواقف )) لكن لا مجيب !


كان صاحبي بسرعة يزعل


جلسنا في السيارة وأنواع الحررر ..


أنا مسكت جوالي العب لعبة سنيكس >>> مغبر


وكل شوي يسألني صاحبي :


(( ماجاء *** اللي ورانا )) >>> يعني لو جاء بتلقاني واقف ضض


وانا اقول : روق يارجال ..


ويقول : (( الله يقلعك أنت وإياوه ))


طبعاً معذور كان مكيف سيارتي وقتها (( يبي له تعبية فريون )) ..


يعني إذا صارت السيارة واقفة ما كأنه يبرد ( الدرايش أرحم ) بقوة


ومراتب السيارة جلد تعال حلها ..


جلسنا في السيارة الى اذان الظهر ( الله يخلف على عزيمة عليان )


نزلنا من السيارة وصلينا بالمسجد المجاور للمجمع ..


وطلعنا بسرعة يمكن راعي السيارة طلع


لقينا المكسيما في مكانها ورجعنا إلى سيارتنا ..


طبعاُ لا تسأل عن الأخلاق شلون صايرة دمار الدمار وخذ تلعين من خويي


الساعة 1.30 بعد الظهر أقبل صاحب السيارة ومعه أمراءة ..


حتى السلام لم يسلم علينا


ركب المكسيما ونزلنا على طول (( وييييين يالحبيب )) ..


وكأنه بريء


فرد علينا بحماقة ( خير إن شاء الله وش فيه ) >>> يا الله قمة البراءة ..


فقلنا له : أبد والله بس حنا من الساعة 9 وحنا ننتظرك وورانا سفر


والمكيف خربان ووو .. واخرتها تركب سيارتك ولا كأن شي صار ..


على الأقل ياخي إعتذر ننتظرك 5 ساعات


فقال : ( اوووووووه معليش نسيت اني مسكر عليكم )


وآخرتها [ معليش ]


فعلاً رد أقبح من فعل


والله لولا المرأءة الي معه يمديه شاف تهاويل


جعلها ماتمر عليكم


آرائكم تهمني ..


أخوكـ/// على كيفي