الجـــزاء الثامــن
الفصــل الثانـــي ...
رجعــت تغسـل وجهـا للمره العشـرين لعـل وعسـى تصحــى من هالكابــوس اللي عايشتـــه ,,, ناظرت صورتهـا بالمرايــه كان وجهـا أحمــر من كثــر ماغسلتــه وعيونهـا تدمــع من المـاء اللي داخلها
وشعــرها القصيـر لاصـق على جبينهـا ,,,سالي تكلم نفسهـا:معقوله اللي قاعـد يصيـر قبـل دقايق بس كانت جالسه مبسوطه اتفنن بالمكياج وسعــد برا يحتـرق ,,,كيف انقلبت المعادله وصرت أن اللي قاعده احترق ,,,اشعــر بالقهــر وقلت الحيلــه احس إن حبـل التف حول رقبتــي يخنقنـي وأنا مو قادره ابعده عنــي أول مره احس اني ضعيـفه مابيدي شــي ,,,كيف يزوجونـي غصب عنـي ..ياربي ليش اللحين بس غصبوني يامانخطبت ماعمرهـم فكروا يغصبوني ليه هالانســإن بذات يجبروني على الزواج منــه ,,ياليتهم غصبوني على أي أحـد الاهــذا ,,يالناس ياعالــم تاريخي معــه غيــر مشـرف هــذ اماتزوجنــي عشـإن شـي واحد بس إنـه ينتقـم منــي ..أنا,,أنا,, صـرت متزوجـه كيف مايصيــر أنا اللي أكـره مأشــوف الرجال كيف اتزوج ,,للحيـن ماني مستوعبــه أن اني طحت بالفـخ اللي رسمـت لأهلـي ,,أكـرهم ...أكــرهم ,,,عمــري ماكرهتم كثـر ماكرهتم اللحيــن ,,هـم سبب كل العذاب اللي عشتـه من يوم فتحــت على الدنيـا الا هاليــوم هم سبب شقاي بهالحيــاه ويقولون ليـه طالعــه قليلة أدب وقحــه ماحتـرم أحد ماهـو انا لقية أحد يربينـي ويعلمنـي الخطـأ ,,
ياسبحـان الله :يـرمون الخزف علـى الارض يقولوا ليه يتكســر..
يلومـوا الجرح بقدامـي وطريقـي ممتلـي اشـواك ...
لا ياربــي أنا ليش حظـي كذا ,,يعنـي الا متـى بعيش بعذاب ....
وبنبرة حقد طالعـه من جواة قلبهـا :حـرام ليـش أنا بـس اتعـذب لازم كل اللي حوالـي يتعـذبون مثلي ويشـربون من نفس الكأس ,,,بتشوفون كلكم أن ماقلبت حياتكم نكــد كل اللي ساهـم فهذا الزواجـه راح ينوله من الطيب نصيــب ,,وأولهـم أنت يازوجـي العزيـز ياســر !!!
طلعت من الحمـام وفكرت الانتقـام ورد الاعتـبار مسيطـره على تفكيـرهـا فتحت دولابهـا وسحبت عباتهـا وشنطتهـا ,,وطلعت جوالهـا واتصلت على ناصــر ...
طلع ناصـر من المجلس بعـد ماشاف رقم سالي لأنه استنتج وش تبي فيـه ماعارض رغبتهـا بالرجعـه للرياض ,,طلع بسـرعه للمواقف منغيـر مايودع جـده وخوالـه حتـى مايعطيهـم فرصـه يفكـروا بايذاء سالي أو منعـها من الرجعـه معـه ...
من يوم دق جوال ناصـر وطلـع عرفت من المتصـل فطلعت وراه بدقايق وبعـد ماودعتهم ,,وهذاني اشوفهـا قدامــي تمخطـر بمشيتهـا وكأنهـا تقول يارض هتزي ماحدا قدي ...وكالعـاده العبـاه ولاكلفت نفسهـا تصكهـا والطرحـه على أكتافهـا ولا كأنهـا جالسـه تمشـي بقسـم الرجال وممكـن بأي وقت يطلع أحد ويشوفهـا ,,,شكلهـا ماكنت منتبهه لي لأنهـا الواضح عليهـا سرحـانه ,,
:خالتي سالي ,,خالتو سالي ...
سالي بنرفزه :تخلخلت عظامك من متـى صرت خالتك ..
بسـام:اوووه خالتـي ,,عمتـي كلـه واحد المهم غطـي وجهـك ..
سالي: وش قلت ياولد أبوك ؟! ,,تأمـر على خواتك مو علي ...
بسـام :اقولك غطي وجهك غبيه انتي يمكن يطلع رجال ويشوفك ..
سالي بعصبيـه :بساموه حل عني لأطلـع سوايا ابوك فيك ,,ومره ثانيه حتى لو شفتني طالعه بدون عبايه ماتكلمني فاهم ,,ولفت على الجهه الثانيه ورجعت طرحتهـا على وجها وشافتـه واقف يناظرها ويبتسـم بأنتصـار ,,,حست أنها بتنفجـر من الغيض اذا ماطلعت حـرتهـا فيـه ,,وبحركـه غيـر اراديـه حملت حصاه متوسطه الحجم من الحوش الترابي وراحت تلحق ياسـر اللي طلـع للمواقـف طلعت وكان المكـان مظلم شافت ناصـر موقف سيارتـه بعيـد واقف عنـدها يكلم ومعطي الباب ظهره يعنـي مايشوفهـا دارت بعيونهـا على السيارات الموجـوده وفجاه اشتغلت وحده من سيارات واشتغـل نورهـا عرفت أنهـا سيارته وبكـل قـوه تمتلكه رمت فيـها الحصـاه على شباك المقعد اللي جنب السائق ,,وكملت طريقهـا لسيارة ناصـر وركبت ورى بدون ماتكلـم ..
ياســر :الحيـوانه بغت تكسـر زجاج الشباك حسبـي الله عليك ,,ولاتدرين ليته كسرتيه عشان أطلع بعديـن من عيـونك وعشـان يرتفع الثمـن اللي راح تدفعينــه ...
ناصـــر:الوو,, هلايمـه ,,ايه ,,طيب حنا ننتظـرك برى اطلعــي ,,يمـه واللي يخليك اطلعي مالي خلق انزل اسلم علــى أحـد ..وبعد ماقفـل ..
ناصـر:سالي انزلي معي سلمي على جدتك وخالاتك ...
سالي سافهتـه ..
ناصــر:سالي يالله عن الدلع كلها عشر دقايق انزلي سلمي على جدتك وخالاتك ...
سالي بأنفعـال:ناصـر بتنزل أنزل أنا رجلي ماراح تمشي شبـر برا السياره ..
ناصــر نزل وصك باب السياره بقـوه ...
طلعت سالي جوالها من الشنطـه وهي تحس أنها مخنوقـه ودقت الرقم ...
وهج :الو هلا سوسو ..
سالي بيأس:وهج خلاص زوجني له ...
وهج بصدمه:كيف مستحيــل ,,حسبي الله عليهــم ذولا مايحســون ,,,
سالي بألم:من زمان توك تدرين ,,وهج ماني قادره اصدق اللي صارلي ...
وهج بحقد:اكرهم ليه يسوون فيك كذا ذولي مو أهل ذولا أعداء ...
سالي :حتى أنا اكرهم والله لخليهم يندمـون ,,وهج احس بختنق وش اسوي ..
وهج وهي تبكـي : خلاص مابيدك شي تسوينـه ...
سالي وهي تشوف ناصر وامـه جايين :خلاص وهج بعدين اكلمك ...
أم ناصـر اللي ركبت قدام :السلام عليكم ..
طبعـاً محد رد ..
أم ناصــر :ليش مانزلتي تسلمين على جدتي وخالاتـي هو جاين من حايل عشانك وآخــر شي تسوين فيهم كذا ..
سالي معطيتهـا أكبــر طاف ..
أم ناصــر:ليه ماتردين القطو أكل لسانك ..
سالي تأففت بقهـــر ..
أم ناصــر:الله يهـديـــك,,ويعيــن المسكيــن اللي ابتلى فيــك ..
سالي :ناصـــر شغل الـfm ...
أم ناصـــر:وأنتي هـذا اللي فالحــه فيـه سمـع الاغانــي ..
ناصـر اللي مل :خلاص يمـه هــدي ,,هي اللحين متضايقه لاتزيدين عليهــا ..وشغل لهـا الـfm
ياســر اللي نشـوة الانتصـار مسيطـره عليـه اتصــل بالسعـود اللي يحســـه أقـرب انســإن لـه أقـرب له حتـى مـن أخــوانـه بـس حـس أنه اخـدعه ياربـي وش بتكون ردة فعلـه لو درى أحسن شي مأقوله اللحيـن ..
سعــود :ياســر وصمخ وش فيك ماتصـل عشان تسكت ..
ياســـر :هاه ,,وش قاعد تقــول .؟؟
سعــود:لا والله شكلك أبد مو صاحـي ,,,حبيبــي روح كمل نومك واذا صح صحت ارجـع كلمنــي ..وقفـل ..
ياســر وهو يناظر بجواله :حسبي الله على بليسك مدري وش فيـه ذا استخف مستحليها هاليومين كل شوي صاك بوجهــي بس عادي يمون النسيب...وجلس يضحك بقوه ..
جنــى بخوف: وهج وجع وش فيـك تبكــن ...
وهج تبكـي ....
جنـى :وهج قولي طيحتـي قلبــي ,,امي ناصـر وسالي صار فيهم شـي لايكون صارلهم حادث ..!!
وهج بانفعـال:فال الله ولا فالك ,,بس ...ورجعت تبكـــي ..
جنــى :اوووووف الله ياخذ ابليسك تكلمـي ,,قسم بالله أنك تقهــرين ..
وهج وهي تكلم وتشهق :سالي خلاص تزوجت ياســر..
جنـــى بصـدمـه :سالي ,,ياســر ..انتي وش قاعد تقولين ..
وهج :حرام عليهم ليش يسون فيهـا كـذا,, ليش يغصبونهـا على شـي ماتبيــه ..
جنــى :وهج ياســر وش دخله بالسـالي أنا مو فاهمـه شـي من اللي قاعده تقولينـه ..
وهج باستغــراب :أنتي ماتدرين أن ياسـر خطب خالتـي سالي ..؟
جنــى بصـرخه :مين خطب سالي ..
وهح :ياســر ياســر ,,واللحيــن خلاص صارت زرجتــه ..
جنــى:وهج تكلمي معـــي بوضوح ماني قادره استوعب ..
تنهدت وهج وجلست تقولها السالفه ...
جنـى وهي ماسك راسهـا:مستحيـل مو قادره اصـدق اللي قاعده تقولينــه ...
وهج :لا صدقـــي ,,خالتــــي باعـــوها وبأبخـــس الاثمـــان ...
فاطمـــه اللي داخلــه البيت والابتســامه شاقـه الحلق :خوش ملكــه الصــراحـه ماقصــروا أهــل المعـــرس بـس شيخــه اللي يشوفهــا يقــول هـذا عزى بنتهـا مو ملكتهــا ..
بسمــه :حتـى فاتــن ماكانت فـرحـانه وبـس تبكــي ,,لدرجــة أن خوات سالـم انتبهوا لهــا وجلسو يسألون ليش تبكــي ..
فاطمــه بطنازه:مسكيـن أمهــا اللي خلتهـا تعلق بالوهــم ,,بــس حامض على بوزهـا تأخذ ولـدي ..
بسمـه :اقـول يمــه أنتي من تبغين ياخـذ ياســر ..؟
فاطمــه اللي انبسطت على السـالفه :أخـوانك كلهـم أبغـاهـم ياخـذون من بنات خواتــي وأخـوانـي ,,حتـى أنتي لو بيدي زوجتك لواحد من عيالهم ..
بسمـــه بداخلهـا:لاتكفين يمـه,,الا أنا طلعيني من مخططاتك أنا ماراح أخذ الا نايـف ولو على جثتـي ..
فاطمــه :وش فيك سكتـي ياحليلك يابسوم تستحيــن ..
ريان :بسوم تستحــي كثرولي منهـا ..
فاطمـه :ماشاءالله من ويـن لافـي يالهـايت ..
ريان عشان يغيــر الموضوع :اوش اوش ,,وش هالكشخـه والله منتي هينـه يأم ريان ..
فاطمـه :اسمـي أم ياســر لوكنت ناســي ...
ريان :والنعم فيك والخيبــه بياســر ..
فاطمـه بعصبيــه :ريان ومـرض لاتقـول عن أخوك كـذا والله لوأنه عدوك ..
ريان وهو يحرك يديه :طيب هـدي ,,لو هـو اللي متكلم عنـي كـذا ماقلتــي شـي ..
فاطمــه:هـو أخـوك الكبيــر ويقول اللي يبـي ..
ريان :يمــه بليز مللتينـي بهالجملــه أخوك الكبير,, أخوك الكبيـر ,,مـدري وش مسـوي لكم هالياســر أنتي وأبوي ياخوفـي يكون ساحـركم ..
بسمــه :كل هالحقـد على ياسـر عشان ماخلى أبوي يشتري لك سياره جديده ..
ريان :ايه مو على كيفـه ..هو كل شهــرين مغيــر سيـارتـه وأنا لــي سنـه ماغيرت سيارتـي ..
فاطمـه :أنت ليش ماتفهــم السيارات اللي يشتريهـا أخوك من حر ماله ماشحدهـا من أبوك مثلك ,,بعـدين سيارتك جديده ليه تغيـرها مالها ست شهور من اشتريتهـا ..
ريان بحسـد :ايه ماهو ولدك المدلل ماترضين عليه ,,ليه ماتصيرين مثل عمتي شيخه لو يطلع عيونهـا نايف تعطيهن له ..
فاطمـه بكره :وقطيعـه مالقيت الا الثـور المدلل ولد عمتك تبغـى تصيـر مثله ,,أنا مدري وش محصله من وراه أمــه هذا كبـره وللحيـن ياخذ مصروفه منهـا بنـدر اللي اصغـر منـه تخـرج وتوظف وهو للحيـن يـدرس..
ريان :وهـذا اللي هامكـم الشغـل ,,اصلاً ليش يتعـب نفسـه ويشتغـل وفلـوس أبـوه ماتحـرقهـا النيران وعمتي ماهي مقصـره عليـه ..
بنـدر اللي توه جاي :السلام عليكـم ..
الكل :وعليكم السلام ..
بندر:وأنت مالك سيـره الا عمتك ولدهـا ,,وبعـدين من الصبح ادق عليك ليش ماترد ؟!
ريان:جوالي مافيـه شحـن مقفـل ..
بنـدر:على العمـوم أبوي متحلف فيك وده بس يشوفك عشان يقصبك ...
ريان :ياليل الزفت ,,وأبوك ماعنـده غيـري يطلـع ضيقه فيـه ..
فاطمـه :وأبوك وينـه ماجاء ..
بنـدر:الشيبان كلهم بعـد العشاء راحو ديوانية أبو سالم ...
ريان :ماقلت لي وش فيـه الشايب علي ..
بندر اللي فصخ شماغه وعقاله ورماه على بسمـه :صفطيـها ,,برايك وش يبي فيك يعني بيصور معك..
ريان :بدون تريقـه ..
بندر: يبغاك تروح معنـا للملكه ,,,هو من يوم درى أن ياسـر مسـافر عصب ...
فاطمـه :اللي يسمعك يقـول مسـافر يلعـب ماكأنـه مسافـر شغــل ..
ريان بغيـره :أكيـد ماترضـى عليـه حبيب القلـب ..
بنـدر :يووه أنت للحين على هالغيـره ,,عيب عليك رجال وش كبرك وتغـار ..
ريان :ايه أنت خلك طيب كـذا لين يسـرق حلالنـا ..
فاطمـه :حسبي الله عليك من ولد استح على وجهك اللي تكلم عنه هـذا أخوك .!
بنـدر:الغيـره اللي تكلـم مـو هو ..
ريان :واللي يسلمكم غيـروا الموضـوع ,,هـذ مركـب قرون استشعـار لـوكان بأخــر الدنيـا يسمعكم ويجـي ...
ياســر اللي واقف على الباب :من هـذا !!..السـلام عليكـم ..
الكـل :وعليكـم السـلام ..
فاطمـه وهي تغايض ريان :هـلا والله بولدي نـور عـيني ..
بنـدر وبسمـه :ههههههههههههههههههههههههههههههههههههههههههههه هههه ههههه.
ياسـر بأستغـراب وهو ينزل جواله ومفاتيحـه على الطاوله اللي بينـه وبين بسمـه : وش فيكـم تضحكـون ؟!
بنـدر وهو يطـالع ياسـر بأعجـاب:ياخطيــر من ويـن جاي على هالكشخــه ,,الثوب اسـود والغتـره اللي يشـوفك يقـول معـرس ,,بس ليـه شلت السكسوكـه,بس تبقـى حلـو ..
ياسـر اللي ارتبك يوم سمع كلمـة معـرس :ماقلت شي جديد ادري أني حلو وسيـم ,,وماحتـاج شهـادة أحـد ..
ريان بصوت واطـي بس سمعـه ياسـر :انتبـه لاتطيـر ..
فاطمـه :هاه يمـه اشوفك رجعـت بدري من القصيـم ..خلصت شغلـك ؟
ياسـر :ايه الحمـدالله خلصت ,,وعشان يجـس نبضهـا :توقعـي يمـه من شفـت هنـاك ؟!
فاطمـه :والله ماعـرف أحـد بالقصيـم ..من شفت ؟!
ياسـر بنبـره غريبـه :ناصـر ولد عمــي .!
فاطمـه بنرفـزه :وين شفتـه اللي ماينسمـى ..
ياســر:بيت جـده ..
فاطمــه :وأنت وش موديك عنـدهم ..
ياســر:شغـل والشغـل ماله دخـل بالخلافات العائليـه ,,وبعـدين أنا مفكــر أخذ منهـم ..
فاطمـه اللي تحسبـه يمـزح :ليه لاقي عنـدهم اللي تليق بياسـر ولد أبـراهيم الـ.......
بسمــه بنبره لها معنــى :يمكــن عاجبتــه سالي المتمــرده ..
فاطمـه بعصبيـه وصراخ :أنتـي كيف تسمحين لنفسك تكلميــن أخوك بهالطـريقـه ..
بسمــه :لوكان ماهو معجب فيهـا محط صورتهــا خلفيـة شاشتـــه ...
ياســر بهالحضـــه حس أن الهـواء اللي بالصاله تبخـــر ,,كل اللي بالصـاله سكتـوا ينتظـرون رد ياســر على اللي قالتـه بسمـــه !!
بسمـه بتريقــه :وش فيك ساكت ليه ماتــرد ,,الا ماقلت مـن متــى تعــرف بنت الـ............
كف علــى وجهـا سكتهــا ,,بسمــه :تظربني عشان ......
ياســر وهو يتنفس بسرعه :واقص لسانك اذا سمعتك تكلمين عنهــا بالشينــه,,,سـالي .....وسكت ثوانـي مرت كنهـا ساعات على الموجودين :زوجتــي واللي يمسهـا يمسنــي وبصـرخه ارعبت بسمــه: فاهمـــه !!!
فاطمـــه :أنت وش قاعـد تقـول استخفيـت ..كيـف زوجتـك .؟
ياســـر :زوجتـي يعنــي زوجتـي تزوجتهـــا ,,ماتفهمونهـا ذي بعــد رحت لأهلهـا وخطبتهـا وافقـوا واليوم ملكنـا فهمتـي وش يعنـي زوجتـي يمــه ..
فاطمــه بذهـــول وصدمــه :تتزوجت من ورانـا هـذ آخــر تربيتــي فيك ...
ياســـر :يمــه أنا ماسـويت شــي حــرام تزوجـت واعتقـد الزواج حــلال,,وبليـز يمــه لاتكبريـن الموضــوع انا توني اليوم مالك يعنـي ماخبيت عليكم شـي ..
فاطمــه :ليه تبغـي لين تزوج ويجيك عيــال بعــدين تخبــرنا ...
ياســـر:اعتقـد أنا كبيـر بما يكفي عشـان أخـذ قرارتـي بنفســي ..
فاطمــه :طيب تبـي تزوج قولي وانا ازوجـك اللي تبيهــا ..
ياســر:طيب ماصار شـي أنا تزوجت اللي ابيـهـا,, واعتقـد سعادتـي هي اللي تهمك ...
فاطمه وهي تمسك راسهـا:سعـادتك مع سالي ,,عاد مالقيت الا سالي اللي سيرتهـا على كـل اللسـإن ..
ياســر:يمـه ارجوك لاتغلطيـن,, وبعـدين لوكانت سيرتها على كل اللسان زي ماتقولين ماكان كل هالعـالم اخطبـوها..
فاطمـه :ذولا ناس فارغيــن يدورون على الجمــال ,,,ماتهمهم الاخـلاق والتـربيــه هـذي وحـده متمـرده مايملى عينهــا أحــد ,,وحـده مالقت أحد يربيهـا ,,أهلهـا تاركينـه على كيفهــا,,والله لو كانت متربيـه بملجأ ماكانت هـذي أخلاقهـا ...
ياســر:يمـه ارجوك كفايــه ,,,خـلاص سالي صارت زوجتـي وكل الكــلام اللي قاعـده تقولين ماعاد ينفــع ,,فلو سمحتـي ريحيني وريحي نفسك وصكي هالموضوع ...
فاطمــه :بكل برود جاي تقولي صكي على الموضوع ولا كأنك مسوي شـي ..
ياســر وهو يطلع الدرج :أنا تعبان بروح أنام بكره نتفاهم ...وأختفــى ..
فاطمــه اللي جلست على الكنب بتعب :الله يجازي اللي كان السبب ,,عين وماصلـت على النبــي ,,أكيـد هـذي حوبـة شيخـه وبنتهـا ,ولاولدي العاقل ياســر يرتكـب غلطـه زي كـذا ..
بنـدر :يمـه هــدي بالك ,,اللي صار مايسوى كـل للي تسوينـه بنفســك ..
بسمــه بحقـد :لاتقـول مايســوى اصلاً أنت وش فهمـك أخوك بيسوينا مصخـره قدام الناس على آخـر الزمـن ..
بنـدر:أنتـي تستكيـن مو أنتي سبب كل هذا ,,وبدال ماتهدين أمك جالسه تزيدينهـا..
ريان اللي جالس ولاهمـه بس ماحب يفوت فرصـه قال يتشمت :ايه مو هـذا ولدك المثالـي ,,شوفي وش سوى تزوج بدون شوركــم ..
بندر بصـرخه :ريان ,وهي مو ناقصتك أنت بعــد ..
ريان اللي ماسك باب الصـاله :ايه مو كلمة الحق صايره ماتعجبكـم ..مع السلامـه وطلـع ..
فاطمــه :خلاص أنتم اطلعوا لغرفكم اتروكني لحـالي ..
بندر بأعتراض :بس يمـه ...
فاطمـه :بندر خلاص قلت لك اطلع غرفتك ...
نزل بندر راسـه وطلع فوق ..
08-27-2009, 04:40 PM
العرض العادي
