[شيخ نفسه]

السلام عليكم ورحمة الله وبركاته .،

،


يسعد مسآئكم ..

تكررت عقب البطا والتقينا ، من عقب مامرن سنينٍ طويلات

في صدفةٍ فيها حشا مادرينا ، ولاهقينا نلتقي عقب مافات

لاشك جابتها الليالي وجينا ، رغم الفراق ورغم ذيك المسافات

في موقٍف بان التوتر علينا ، لحظه تلين إبها القلوب القويات

قالت شلونك قلت ربك عوينا ، الحمد لله عاضني عقب لوعات

الله رزقني في هنوفٍ تبينا ، احيت خفوقٍ كان بعداد الأموات

هي نور عيني فرحتي والضنينا ، ألقابها عن ظيقة الصدر سجات

قالت سليت وقلت عقبك سلينا ، لكن عقب مالعنّا الحب مرات

قالت شلون وقلت لاتسألينا ، مافات فات ولا تفيد الحسوفات

قالت تكلم قلت مهما حكينا ، الدمع ماينفع عزيزٍ أليا مات

قالت نسيت وقلت لامانسينا ، لكن قنعنا والقناعه من الذات

قالت أروح وقلت وش في يدينا ، روحي عسى في كل خطوه سلامات

بصبر على فرقاك مهما حيينا ، ولا تشوه صادق الحب زلات

قالت على ماكنت دنيا ودينا ، تكرم ونكرم عن دروبٍ رديات

قلت اسمحيلي قبل لاترحلينا ، يم الديار اللي علينا بعيدات

تراي ذخرٍ لاحدتك السنينا ، اجيك مهما واجهتني صعوبات

من اليوم اخوك وغيرها ما بغينا ، كلي فداك ان صار بالوقت ميلات

وتبسمت بإعجاب مدري حنينا ، وتهشمت قدام عيني بعبرات

قالت فمان الله قلت انتهينا ، وقفت تكلم نفسها بس بسكات

وقفت تقديرٍ لها ثم مشينا ، دربٍ مشوه اهل القلوب العفيفات

امشي واردد ليتنا ماالتقينا ، وش جابها عقب السنين الطويلات



وسلآمتكم .،

م/ن