" مـاذا يـمكـن ان تـفـعـل بـ 100 ريـال؟ "

[شيخ نفسه]

السلام عليكم ورحمة الله




ماذا يمكن ان تفعل بهذه المئه لو حصلت عليها؟

في ظل ارتفاع الأسعار والغلاء ماذا يمكن ان تجلب لك؟

سندخل بالموضوع مباشره وسأكتب بالعاميه

انت وثلاثه من الشباب طالعين وتبي تعشيهم عشى دسم بإحد المطاعم

احتمال كبير ماراح تكفي قيمة العشاء ويمكن راح تزود 50 ريال عليها

طيب ممكن تروح لمحل زينة سيارات بس وش راح تسوي لك؟

بتركب تضليله؟يمكن تشتري درج للإشرطه؟يمكن تشتري تلصيقات؟ممكن تشتري اي شي وتركبه ويصير مخالف لنظام المرور وتاخذ مخالفه قيمتها اضعاف قيمة الي شريته

ممكن تروح تشتري فيها نسختين سي دي اصلي واحد لمحمد عبده وواحد لراشد الماجد؟

طيب راح تسمعها يومين وراح تمل بعدها غير الذنوب الي كسبتها!!

تشتري فيها بطاقة سوا وتخلص بنفس اليوم على كيف الحال ووش اخبارك؟

ممكن تشتري فيها قميص رياضي وينظم لدكة الاحتياط بالدولاب لانك بتلبسه كم يوم وطبيعي راح تغير القميص لقميص آخر ؟

ممكن تعبي فيها سيارتك بنزين والباقي تروح الحلاق تحلق فيه؟

ممكن تشتري لخطيبتك هديه فيها؟ وانصحك ماتسويها لان فضيحتك راح تصير بجلاجل لانك راح تكون بخيل مشتري هديه قيمتها 100 ريال بس !!!!

صدق توهيقه هالميه وش تجيب لك ؟

كل الاشياء الي ذكرناها قد تكون مفيده بنظر البعض لكنها منقطعه الفائده يعني فتره وتنتهي فايدتها

















طيب شباب هل منا احد ماعليه ذنوب؟

ليش مانشتري بالميه هذي شي ينفعنا بإخرتنا

وش رايك ان هالميه الي انت متوهق فيها راح تخليك ترافق المصطفى صلى الله عليه وسلم بالجنه؟


قال رسول الله صلى الله عليه وسلم أنا وكافل اليتيم في الجنة هكذا وأشار بالسبابة والوسطى وفرج بينهما ) رواه البخاري







انا اقولك كيف

الندوه العالميه للشباب الاسلامي عندهم برنامج كفالة الايتام

تقدر تجيهم وتختار جنس اليتيم وعمره وتختاره بين آلاف الصور والدوله الي هو فيها وتكفله

ويعطونك استماره فيها صورته ومعلومات كامله عنه

ويعطونك تقارير اولا بإول عن اليتيم وحالته وعدد الاجزاء الي حفظها من القرآن وصور مختلفه له

طبعا عندهم ايتام داخل المملكه قيمة كفالتهم 200 ريال وتقدر تشوف اليتيم وتزوره وتتطمن على حالته ولاتنسون ان المسح على رأس اليتيم لها ثواب

تخيلو يا اخوان الميه ريال الي ماكنا نراها شي تسوي اشياء كبيره مره

يمكن تكفل يتيم يكبر ويكون عالم دين ينفع بعلمه ملايين المسلمين

يمكن تكفل يتيم يكبر ويصير مجاهد يجوب الارض لإعلاء كلمة الدين

يمكن تكفل يتيمه تربي ابناءها على الدين

والله يا اخوان الميه ريال كل شهر ماراح تزنق اي شخص سواء موظف ولا طالب يعتمد على مصروفه

يعني بالسنه 1200 ريال فقط

الله يوفق الجميع لما فيه الخير

ولاتبخلو علي بدعائكم


كتب من قبل فيصل العنقري

معهد ترايدنت