مرثية الوالدة : عبد الله عتيق العدوان

[شيخ نفسه]

بسم الله الرحمن الرحيم

مرثية بالوالدة رحمها الله المتوفاة في 26 / 6 / 1430 هـ. رحم الله أمواتنا وأموات المسلمين

يالله يامن رد موسى على أمه
ويامنجي ذا النون من باطن الحوت

إنك تعين اللي فقد شوفة أمه
وإنك تصبرني على الحق والموت

عينٍ فقدته يوم أنا رحت لمه
وسط العناية كنها وسط تابوت

وعينٍ فقدته يوم حطوك يمه
وسط القبر والحزن يلوتني لوت

ويا الله عسى الفردوس منزلك يمه
وتجاورين الأنبياء بزين الأبيوت

وقت العزاء يا خال يكود همه
كني قريصٍ ينتظر ساعة الموت

لا مهتني بالنوم ولا الزاد أشمه
كني رضيعٍ وأنفطم صار مسلوت

أبكيك يمه كل ما جيت لمه
بيتٍ سكنتي به من الجود منحوت

ويبكيك عودٍ زود البعد همه
مع المرض والوجد تقول مكبوت

فقيدة الفيحاء على قول يمه
جيراننا وقت مضى قبل ما تموت

حُمر النواظر قيل وقت المهمه
هم يحتمون الجار لا صاح بالصوت

ذيبٍ عوى منظام من نزف دمه
ويجاوبه ذيبٍ على رأس ساحوت

وأنا رقيت بعاليٍ فوق قمه
وجريت صوتٍ يسمعه من شبع موت

بالصوت اناديها وأنا اقول يمه
ما من مجيب والعقل صار مفلوت

يا أهل الشعر بالمدح وإلا المذمه
وأهل الغزل بالزين من وسط بيروت

يامن يجاريني وجرحي يلمه
ويا من يجاوب عالي الصوت بالصوت

أنا أشهد أنه بير يسبت مجمه
من عقب ماهي كنها عين جالوت

وجدي على شوفه وجدي بضمه
وشوقي لها شوق العمى لشوف الأنبوت

وأختامها صلوا على خير الأمه
نبينا محمد عدد من كسب قوت

قائل هذه القصيدة إبنها : عبد الله عتيق العدوان : عنيزة

حُمر النواظر " جيران جدي في الفيحاء في بيته القديم "

المرثية لجدتي رحمها الله