لعنبو قصة غرام ٍ كل أبوها كلمتين
إبتدينا عند ( أحبك ) وإنتهينا عند ( باي)
تونا بالحب والله ما مشينا خطوتين
وإنتهى الموضوع فجأة حتى مدري وش خطاي
انتهى الموضوع فجأه بالسهوله تحكمين ؟
وين أحبك ؟ وين أبيك ؟ وين ساكن في حشاي ؟
يمكن إنك ما وفيتي يوم جيتي تعشقين
ويمكن انك تحسبيني بتبعك من دون راي
ويمكن اصلا ما عشقتي بس كنتي تلعبين
ويمكن انك ما وصلتي في هواك لمستواي
ويمكن اني ماعرفتك في الحقيقه وش تبين
ويمكن اني خنت نفسي يوم اعطيتك وفاي
علميني في الهوى ياجاهله وش تعرفين ؟
تعرفين انك غديتي ( شي ) يجري في دماي
علميني في العطا والتضحيه وش تفهمين ؟؟
لعنبو حيّك عشانك بعت أقرب أقرباي
كنت أحطك في عيوني تسرحين وتمرحين
كنت اشيل هموم قلبك وارمي همومي وراي
كنت اطير من السعاده يوم اشوفك تضحكين
كنت ذايب في هواكي مثل سكر وسط ماي
كنت نايم في العسل وارسم من الفرحه سنين
كنت اظنك قلب عاشق ماسكن وسطه سواي
ما وعيت الا وأنتي في خفوقي تطعنين
ما وعيت الا وسيفك في الحشا رايح وجاي
ورده اي والله ورده بس عرفتي تجرحين
كل شي فيني جريح الاااااااا ( فخامة كبرياي )
ما تأثرت بغيابك ويش يعني دمعتين ؟؟
بكره انسى صدقيني وأرجع بكامل قواي
أدري إن حنا إفترقنا بس أبفهم حاجتين
علميني وش كسبتي ؟ وعلميني وش خطاي
أصلا الموضوع كله ما تعدى كلمتين
التقينا عند ( أحبك ) وإفترقنا عند ( باي)