تسأل علي يا خاين الحب و الملح تبي تشوف شلون حالي بلياك
هذا أنا متوسد الهم...و الجرح أحاول أنسى ماضي الحب و أنساك
جيت ببرودك تعتذر و تطلب الصلح لك عين تنطق بالمحبة شفاياك
يالي ذبحت الحب في داخلي ذبح ما عدت اصدق دمعة العين و اهواك
خذلتني ما طعت من دمعتي نصح وكل شيء خذلني يومها من سوياك
الله يكثر خير عيني ما هو مدح ما قصرت بدموعها يوم فرقاك
تسهر معي من هيضة الجرح للصبح و تجيب لي لاعسعس الليل ذكراك
خلاص لم السالفة و اقصر الشرح ما عاد تغري العين..طلة محياك
ولا عدت طيبتك و وجهك السمح انا أشجنيت بعشرتك غير الاشواك
ارجوك لا تنثر على جرحي الملح اتركني احاول اقتل الحب و انساك