حلا الكون الله يعافيكي ع الموضوع اللي جا ع الوتر الحساس بما انه بوقته وواقعي
صحيح اننا بالسعودي نشتكي من النقاط اللي ذكرتيها بالعطله
ملل طفش كدر كثر نوم كثر سهر عدم تنظيم للغذاء وكل هذا بسبب الضياع الوقتي
بأبداا بالشباب ثم اتطرق لنصفنا الآخر
الشباب .. مابين البين
يعني بين وبين فيه فراغ وفيه شي يملى الوقت
فمثلا احنا يالشباب ممنوع معروف ندخل أي متنزه أو مكان أجتماع عوائل من غير أهل
طيب انا مو فاضي البس امي ولا اي وحده تقربلي .. البسها عباتها وافرفر فيها بين هالمتنزهات يوميا
أنا شاب وأبي أطلع مع جنسي وجيلي يعني مع شباب
العوائل صحيح الطلعه لابد منها معاهم بس مو واجد يعني بالاسبوعين مره
بس الأصحاب ؟ ممكن بشكل يومي
فبالنهايه أحنا يالشباب لكل مكان نروح له نلاقي لافته حمرا تقول عواااااااائل
وبكذا لاتلومونا اذا سهرنا الليل ونمنا النهار أو سافرنا برا وتركنا سياحات السعوديه اللي هم بازين فيها
طبعا ماأنسى جهود أهل الخير .. سوو أماكن تجمعات شبابيه بالصيفيات
بس مو كل شاب يعجبه اللي يسوونه أهل الخير
فمثلا فيه بعض المراكز الخيريه يقولون سجلو ياشباب راح نوسع سدوركم ونونسكم ومن هالكلام
وبس الشاب يسجل يروحو فيه لثلاجات الموتى والمقابر والمستشفيات ويقولو له اتعظ ياميت القلب وكأنه مسوي جريمه
طيب أوكي انا من واجبي اتعظ واشوف بس مو بالعطله العطله أبي استانس والعب
بالنهايه صار شعارنا يالشباب لما احد يسالنا يقول وين راح تصيف ؟ نقوله تحت المكيف
طبعا تكلمنا وتكلمنا كثير بوسائل الاعلام وغيره
وانا احد اللي تحدثو لأحدى وسائل الاعلام السعوديه وعلى الهواء مباشره قبل العطله بأسبوعين
وكان عنوان موضوعي الشباب والأجازه على الأبواب ويمكن مفهوم العنوان بس ولا حرك ساكن ماحولنا احد
لكن نقول الله يخلي النوم والنت والاستراحات والارصفه والمقاهي والطعوس والبران
وانتو يالحريم والعوائل لكم المتنزهات والاماكن العامه والاسواق الفخمه والدلع وكل شي يسليكم
عشان كذا أغلب الشباب السعودي نت وتلفزيون ومباريات ومدري كيف
صحيح فيه دورات بالعطله لتعليم الكومبيوتر واللغه الأنجليزيه واي مهارات ممكن تفيد الشاب
بس الأشياء هذي بوقت الدراسه مو بالعطله احنا بالعطله نبي فرفشه مو قلق ودراسه ومدري كيف
على العمو احنا تعودنا على الوضع وخلاص تجي العطله وتروح واحنا ماحسينا فيها
علمنا بحلاوة العطله ايام الطفوله لما كنا نلعب بالسياكل ومايهمنا العالم بكبره
وياليت ماتطلبون من الشباب السعودي فوق طاقته كفايه أنه شبه مستعبد ومقهور
اما عن البنات
صراحه مالهم اي عذر ابدااااااااااا
لان الدوله أساسا ملتفته للبنات او بنت حوا بشكل عام أكثر من الرجل
الاماكن العامه بمنتزهاتها وغيره كله تدخلها من غير احم ياست وين المحرم
وفيه أشياء تفيدها بفراغها
مثل ماذكرت الاخت .. خياطه تطريز تعلم طبخ وغيره .. كلها مفيده لمستقبلها وهي شبه مسليه للبنت
لان البنت بعادتها هادئه وتبي شي هادي يسليها مو مثل الولد يبي يطامر ويلعب
بس للاسف وللأسف الشديد أن اغلب بناتنا ماحولك احد
وانا اقول أغلبهن مو كلهن
يعني بدل ماتتعلم شي حلو يفيدها أو تلتحق بمدارس تحفيظ قران تحفظ لها سورتين ينفعوها
تلاقيها حافظه كل الممثلين اللي تجي صورهم بقنواة الافلام واخص روتانا سينما
وطبعا مجلاة سيدتي وفواصل ورتانا ومدري كيف ؟
هذي المجلات محفوظه من الجلاده للجلاده مافيه مشاكل
بس احفضي لك شي يفيدك بعدين ؟ سوري مااقدر أو مافي وقت انا مشغوله
طبعا كل كلامي اللي قلته عن بعض البنات مو كلهن كذا .. انا قلت بعضهن
وطبيعي دوله فيها اكثر من 22 مليون نسمه يكون فيها بنات اشكال والوان
بالنهايه
الدوله مقصره مع الشباب والشباب مهملين انفسهم
الدوله مو مقصره مع البنات بس البنات اقسام بعضهم فاهم صح وعارفه لوقتها وبعضهم ماتعرف الكوع من البوع
الأهل طبيعي لهم دور بالرفاهيه وغيرها
والله يرزقنا بالمعامله العادله واللي تصب لصالح الطرفين بكل وجه حق
واتمنى التوفيق للجميع وتقبلي مروري
08-10-2007, 05:24 AM
المواضيع المتشابهه
العرض الشجري