أعظم ( وجع ) بالحب لا صرت تشتاق^^للي تحب ولا أنت قـادر تشوفـه

[شيخ نفسه]

أعظم ( وجع ) بالحب لا صرت تشتاق


للي تحب ولا أنت قـادر تشوفـه




يكويك "جمرٍ" داخـل القلـب حـرّاق

زود ٍعلـى نـاره تـهـدّك طيـوفـه




لا مرّ بعيونـك كمـا نـوض بـرّاق

مالـك مجـال إلاّ تسايـر ظـروفـه




ياصاحبي لـو بينـي وبينـك آفـاق

نفسي معك في كـل حالـة شغوفـة




ما كنت "قبلك" خلف الإحساس أنساق

وإن شفت درب الحب أسكت وأطوفـه




يلين جاني منعطف سيـل الأشـواق

بأمر الغرام اللي سطت بـي سيوفـه




قاومت لكن ! خافـي الحـب ماطـاق

صابه صمود ٍ زلـزل أجـزاء خوفـه




بغيـت أردّه بـس حسيـت بإخفـاق

في لحظـة ٍ"مـد" لـكفوفـك كفوفـه



جا لك ولا كنت أحسب الحـب دفـاق

لين أغرق الخافق وسـال بـنزوفـه




أثْـر المحبـة نبضهـا دوم سـرّاق

دمي وهـو دمـي بجسمـي تحوفـه




حاولت أداري حـب قلبـي بـالأوراق

وأثْر الورق ماهـي أمينـة حروفـه




سلّ المشاعر من متاهـات الأعمـاق

وأصبح يفسرّ كـل وضـع بوصوفـه




يكتب تقارير الغـلا وقـت الإشـراق

وعند المسا يعطيـك باقـي كشوفـه




يا"جامـع" ٍ حنيّـة الكـون بأخـلاق

معذور قلبـي لـو يضمـك بجوفـه